Ukrayina prezidenti Volodımır Zelenskıy Nariman Celâlnı Türkiye elçisi olaraq tayin etti. Vesiqa devlet yolbaşçısınıñsaytında derc etildi.
«Celâlov Nariman Enveroviçni Ukrayinanıñ Türkiye Cumhuriyeti Fevqulâde ve Vekâletli Elçisi vazifesine tayin etmek», – dep aytıla haberde.
Zelenskıynıñ qararını Qırımtatar Milliy Meclisiniñ reisi Refat Çubarov izaatladı: «Ukrayina prezidenti, minnetdarlıq bildiremiz! Lâyıq biri! Ukrayinanıñ Türkiye Cumhuriyeti Fevqulâde ve Vekâletli Elçisi, hayırlaymız!».
Celâlnıñ Ukrayinanıñ Türkiye elçisi olacağını Zelenskıy 2024 senesi dekabrniñ 20-nde bildirdi.
Nariman Celâl Qırımtatar Milliy Meclis reisiniñ birinci muavini ola. 2014 senesi Rusiye işğalinden soñ Qırımda qalğan Meclis vekillerinden biridir. 2021 senesi sentâbr ayında Rusiye FSB hadimleri tarafından apiske alınıp, diversiya yapqanında qabaatlandı ve 17 yılğa üküm etildi. Daa doquz vatandaş reinesinen beraber Celâl 2024 senesi iyün ayında Rusiye apsinden azat etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.