"Sarı şerit" areketi, faallerniñ Kezlev, Aqmescit ve Aqyarda yerleştirgen Qırımnıñ Rusiye tarafından ilhaqına qarşılıq köstergen yañı ukrayin timsalleriniñ fotoresimlerini derc etti. Foto areketniñ telegram kanalında derc etildi.
"Sarı şerit" areketiniñ faalleri Qırımnıñ er köşesinden işğalcilerge mında Ukrayina olğanını hatırlatmağa devam eteler. Tirenüv devam ete! Yarımadanıñ bütünley işğalden azat etilmesine qadar devam etecek", — dep qayd ettiler faaller.
"Sarı şerit" teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Simeiz, Balıqlava kibi kiçik şeerlerniñ sakinleri qoşula.
Areketniñ eñ meşur aktsiyalarından biri – yarımadada sare şeritlerniñ bağlanması ve "Qırım Ukrayinadır" sözlerinen yazuvlı şiarlarnıñ yapıştırılması. Faaller Boyko dağında da Ukrayina bayrağını tiklegen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.AqiqatnıñTelegram ve İnstagram saifelerinden taqip etiñiz.