Rusiye quvetçileri, Ukrayina telükesizlik hızmetinen işbirlikte bulunğanında şübheli sayılğan eki Aqyar sakinini yaqalağan. Bu aqta mayısnıñ 15-nde Rusiye kütleviy haber vastaları Rusiye FSB-sınıñ Qırım ve Aqyar idaresine esaslanıp bildire.
Yaqalanğanlardan biri 54 yaşında, ekincisi 51 yaşında. Müessisede qayd etkenlerine köre, olar SBU-ğa "raketa darbelerinde qullanılğan" şeerde Rusiye arbiy obyektleri ve ava mudafaası sistemalarınıñ bulunması aqqında malümatnı bergenler. Bundan da ğayrı, ev tintüvleri vaqtında 51 yaşındaki mabüsniñ evinde patlayıcı ve patlatıcılar tapıldı, dep aytıla. Rusiye quvetçileriniñ beyanatlarını teşkermek imkânsız.
Erkeklerniñ adları ve soyadları aydınlatılmay, olarnıñ açıq izaatları da yoq. Al-azırda yaqalanğanlarğa qarşı Rusiye Ceza kodeksiniñ 275-inci maddesine istinaden (devlet hainligi) cinaiy davalar açıldı. Eger qabaatları isbatlansa, olarğa 20 yılğa qadar apis cezası berile bile. SBU Rusiye quvetçileriniñ bildirüvlerini izaatlamadı.
"KrımSOS" aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etilgen edi. Cinaiy davalar içün sebepler olaraq Rusiye Federatsiyasında yasaq etilgen teşkilâtlarnen alâqalar, devlet hainligi, casuslıq, açıq beyanatlar, diversiya teşkil etüv ya da zorbalıqqa çağıruvlar şeklinde qabaatlavlar qullanıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.