Kanada qırımtatar birligi ve «Qırım-Kanada» Medeniyet komiteti Torontoda Royal Theatrede 1944 senesi qırımtatar sürgünliginiñ 81 yılına bağışlanğan tedbirni keçirdiler.
Tedbirde diplomatik vekiller ve Azerbaycan, Türkiye, Qırğızistan ve Tibet cemiyetlerinden musafirler bar edi.
Musafirler arasında Kanada parlamentiniñ deputatı İvan Beyker bar edi, onı saylavlarda ğalebenen hayırladı ve faalligi içün, hususan qırımtatar aqlarınen bağlı parlament teşebbüsi içün teşekkürler bildirdiler. Ukrayinanıñ Torontro Baş konsulı Oleg Mıkolenko qırımtatar halqına ve Qırımnıñ azat etilüvi oğrunda küreşine qoltutqanını bildirdi.
Tedbirde rejissör Ahtem Seitablayevniñ «Başqasınıñ duası» bediiy filmi kösterildi. Bu levha ayatını telükege atıp, Qırımnıñ natsist işğali vaqtında yeudiy balalarnı qorçalağan qırımtatarı Saide Arifovanıñ kerçek ikâyesine esaslana.
Kinoteatrniñ foyyesinde Kanadada yaşağan qırımtatar diasporasından balalar tarafından sürgünlik mevzusında yapılğan bala resimlerinden ibaret kiçik sergi de yer aldı. Aqşamnıñ soñunda er bir musafirge küçük bahşış berildi – Qırımdan Kanadağa ketirilgen bir torba qurutılğan Qırım gülleri ve gül yağı.
«Bugün, 1944 senesi olğanı kibi, qırımtatarlar işğal etilgen Qırımda basqığa oğray. Kanadada bile bir çoq yañı cemiyet azamız açıq-açıq qoşulmağa qorqa – çünki tuvğanları anda, basqı altında. Amma medeniyet ve aqiqat yeñilmez», – dep qayd etti «Qırım-Kanada» Medeniyet komitetiniñ prezidenti Elvira İrsay.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
Bıltır oktâbrniñ 9-nda Ukrayina Yuqarı Radası çetel devletleriniñ ükümetleri ve parlamentlerini qırımtatarlarnıñ 1944 senesi Qırımdan sürgün etilüvini qırımtatar halqınıñ genotsidi olaraq tanımağa çağırdı.
Dekabrniñ 18-nde Çehiya Senatı 1944 senesi qırımtatar sürgünligini genotsid olaraq tanıdı. Qayd etilgen 74 senatordan 70-i bu qararğa rey berdi.
Oktâbrniñ ortasında Estoniya parlamenti 1944 senesi sovet rejimi tarafından qırımtatar halqınıñ sürgünligi genotsid olaraq tanılğanı aqqında beyanatnı tasdıqladı.
Qırımtatar halqınıñ lideri Mustafa Cemilev Azatlıq Radiosına bergen intervyüsında Çehiya akimiyeti başqa memleketlerni 1944 senesi qırımtatar halqınıñ sürgünligini genotsid olaraq tanımağa iqna etmek içün öz tesirini qullanmağa söz berdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.AqiqatnıñTelegram ve İnstagram saifelerinden taqip etiñiz.