İstanbulda Ukrayina ve Rusiye eyyetleriniñ körüşüvi başlandı, dep haber ete Ukrayina kütleviy haber vastaları mayısnıñ 16-nda vaqia yerinden.
«Suspilne» malümatına köre, anda Türkiye vekilleri de bar. Azatlıq Radiosınıñ rus hızmeti bildirgenine köre, Türkiye Tış işler naziri Hakan Fidan çıqışta bulundı.
Ukrayina prezidentiniñ ofis yolbaşçısı ve eyyet azası Andriy Yermak muzakerelerniñ başlanğıçını izaatladı:
«Rusiyeliler 2022 senesinen assotsiatsiya yapmağa istey. Amma muzakerelerni bağlağan bir şey bar – o da tek İstanbul şeeri. Başqa bir şey yoq. Rusiyelilerniñ bugünki künni 2022 senesine bağlamaq ıntıluvları işke yaramaycaq».
«Ukrinform» agentligi bildirgenine köre, körüşüv keç başlandı – Kyiv saatınen 12:30-da başlaycaq edi.
Rusiye eyyetiniñ yolbaşçısı Vladimir Medinskiy ABD temsilcilerinen de körüşti, dep haber etti «İnterfaks» agentliginiñ menbası.
İstanbulda Ukrayina, ABD ve Türkiye eyyetleriniñ üç taraflı muzakereleri yekünlendi.
İstanbuldaki muzakerelerde Rusiye eyyetiniñ yolbaşçısı, Rusiye prezidentiniñ yardımcısı Vladimir Medinskiy evelden Rusiye vekilleri mayısnıñ 16-nda saba saat 10-dan başlap Ukrayina tarafını bekleycekler, dep bildirdi.
ABD Devlet kâtibi Marko Rubio İstanbulda keçirilecek muzakerelerden Rusiyeniñ Ukrayinağa qarşı cenkini bitirüv meselesinde büyük beklevleri yoq, dep ayttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.