Üç yıl devamında ilk sefer Ukrayina ve Rusiye vekilleri arasında keçirilgen doğrudan-doğru muzakereler İstanbulda tahminen 90 daqqalıq dialogdan soñ yekünlendi, dep bildire dünya haber agentlikleri Türkiye Tış işler nazirliginiñ malümatına esaslanıp.
Ukrayina Mudafaa naziri Rustem Umerov esirlerni deñişüv ve ateş toqtatıluvı muzakere etildi, dep bildirdi.
«Biz memleketlerniñ liderler körüşüvini azırlaymız. «Biñge biñ» (formulasına köre esirlerni deñişüv) aqqında laf ettik», – dedi Umerov.
İstanbulda Rusiye sessizlik rejiminiñ şartı olaraq cenk yolunen zapt etilmegen topraqlardan Ukrayina ordusını çıqarmaq talabını aydınlattı, dep aqta muzakere ketişatından haberdar olğan gizli menbasına esaslanıp, «Suspilne» haber etti.
Rusiye eyyetiniñ yolbaşçısı Vladimir Medinskiy bildirgenine köre, Rusiye tarafı «dialog neticelerinden memnün qaldı». O, esirler deñişüvi añlaşmasını tasdıqladı ve Ukrayina devlet yolbaşçılarınıñ körüşüvini talap etti, «Rusiye bunı köz ögüne aldı», dep bildirdi.
«Biz er bir taraf ateş toqtatıluvını nasıl körgenini taqdim etecek, tafsilâtlarını yazacaq, dep añlaştıq. Bu taqdim etilgen soñ muzakerelerimizni devam ettirmek (bu da añlaşma oldı) doğru olur, dep tüşünemiz», – dedi Medinskiy.
Mayısnıñ 16-nda İstanbulda Ukrayina ve Rusiye eyyetleriniñ körüşüvi başlandı.
İstanbulda Ukrayina, ABD ve Türkiye eyyetleriniñ üç taraflı muzakereleri yekünlendi.
İstanbuldaki muzakerelerde Rusiye eyyetiniñ yolbaşçısı, Rusiye prezidentiniñ yardımcısı Vladimir Medinskiy evelden Rusiye vekilleri mayısnıñ 16-nda saba saat 10-dan başlap Ukrayina tarafını bekleycekler, dep bildirdi.
ABD Devlet kâtibi Marko Rubio İstanbulda keçirilecek muzakerelerden Rusiyeniñ Ukrayinağa qarşı cenkini bitirüv meselesinde büyük beklevleri yoq, dep ayttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.