Rusiye istinaf mahkemesi ukrayin qadını Oksana Senedjuknıñ 15 yıllıq apis cezasını deñiştirmedi. Bu aqta "Suspilne" onıñ qızı Mariya Kostükke atıf etip bildire.
Onıñ aytqanına köre, tuvğanlarına yazğan mektübinde Senedjuk adalet olmağanını qayd etti.
"Anam mektüp yazdı. O, ükümniñ bütünley olğanı kibi qaldırılğanını ayttı. Yazıq ki, olar endi azır olğan bir qararnen keldiler. İç bir adalet yoq edi", — dep tarif etti Kostük.
58 yaşındaki Oksana Senedjuk tasil boyunca filolog, yarımada işğal etilgenine qadar Aqyar şeer devlet memuriyetinde çalıştı. 2014 senesine qadar yapqan işleri ve faal vatandaşlıq mevamı içün mukâfatlarğa saiptir. Yevromaydannı faal sürette destekley ve onda iştirak ete edi.
"KrımSOS" temsilcileri diger aq qorçalayıcı teşkilâtlarnen beraberlikte Oksana Senedjuknıñ siyasiy sebeplerden taqip etilmesini takbih etkenlerini ve onıñ azat etilmesini talap etkenlerini bildirdiler. Aq qorçalayıcılar Ukrayina akimiyetini Senedjuknıñ taqip etilmesine alâqası olğanlarğa qarşı sanktsiyalar kirsetmege ve halqara toplulıqnı Rusiyege qanunsız sürette apiske alınğanlarnı azat etmesi içün basqını quvetleştirmege çağırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
