Dronlar Qırımğa ücüm etti, dep haber ete Ukrayina ve Rusiye Telegram kanalları. Olarnıñ malümatına köre, darbe Anğara (Perevalnoye) köyü civarında Rusiye Federatsiyası Qara deñiz flotunıñ yalı qaravulınıñ 126-ncı ayrı brigadası yerleşken silâ anbarına endirildi.
İçtimaiy ağda Anğara civarında çıqqan yanğın fotoresimleri de peyda oldı. Tasdıqlanmağan malümatqa köre, anbarğa qarşı darbe neticesinde elâk olğan arbiyler bar.
Aqyarda Kaça ve Belbek uçaq alanları rayonında patlavlar eşitildi, dep yaza «Krımskiy veter». Aqyarnıñ Rusiye yolbaşçısı Mihail Razvojayev bildirgenine köre, ava mudafaası Qara deñizde altı uçucısıznı urıp tüşürgen.
SHOT şaatlarnıñ malümatına esaslanıp, saba saat 5-lerde Yaltada eñ az beş patlav eşitildi – yerli sakinler küçlü ses eşitti ve yanma kördi. Patlavlar Gurzuf, Alupka ve Aluştada da eşitildi.
Aqmescit-Aluşta yolu areketke qapatıldı.
Ukrayina tarafı ücüm malümatını izaatlamay.
Qırımnıñ arbiy obyektler haritasına köre, Anğara köyünde Rusiye Federatsiyası Qara deñiz flotunıñ yalı qaravulınıñ 126-ncı ayrı brigadasınıñ (arbiy bölük 12676) ve 8-inci ayrı artpolknıñ (arbiy bölük 87714) arbiy bazası yerleşe.
Anda arbiy tehnika ve silâ ve, büyük ihtimalnen, yanıcı-yağlayıcı malzemeler içün bokslar bar. Baza eki kere ücümge oğrağan edi – 2023 senesi martnıñ 17-nde ve avgustnıñ 25-nde.
2022 senesinden başlap yarımada aman-aman er kün uçucısız ve raketalarnıñ ücümine oğray, çoqusı alda Rusiye Federatsiyasınıñ Mudafaa nazirligi ya da Rusiye akimiyeti, bu malümat olsa da, arbiy obyektlerge darbe endirilgenini tasdıqlamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
