Rusiye kontrolindeki Qırım Yuqarı mahkemesi Qırımnıñ Rusiye prokuraturası Ukrayina telükesizlik hızmeti ile işbirlikte qabaatlağan Aqmescit rayonınıñ sakinini mahkeme etecek. Bu aqta quralaynıñ 15-nde müessiseniñ matbuat hızmeti haber etti.
Rusiye prokuraturası bildire ki, qabaatlanğan kişi 2021 senesi SBU vekillerinen bağlanğan, 2024 senesi orta küz ayında ise patlayıcı aletni tapıp evde saqlamaq kerek edi, amma Rusiye FSB-sı onı tuttı. Bu iddialarnı teşkermek imkânsız, SBU bu davanı izaatlamay.
Qabaatlanğannıñ adı ve soyadı bildirilmey, onıñ açıq izaatları yoq. Eger qabaatı isbatlansa, oña Rusiye Federatsiyası Ceza kodeksiniñ 275.1 maddesine köre 8 yılğa qadar apis cezası berilecek. (Çetel devleti, halqara ya da çetel teşkilâtı ile gizli işbirlik).
Quralaynıñ 15-nde Rusiye quvetçileri Ukrayina telükesizlik hızmeti ile işbirlikte şübheli sayılğan eki Aqyar sakinini yaqaladı, dep haber etilgen edi.
"KrımSOS" aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etilgen edi. Cinaiy davalar içün sebepler olaraq Rusiye Federatsiyasında yasaq etilgen teşkilâtlarnen alâqalar, devlet hainligi, casuslıq, açıq beyanatlar, diversiya teşkil etüv ya da zorbalıqqa çağıruvlar şeklinde qabaatlavlar qullanıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
