Mayısnıñ 7-nde tutulğan 24 yaşında qırımtatar qızı Hatice Büyühçannıñ soy-sopları bulunğan yerini alâ daa bilmey. Bu aqta Qırımtatar Milliy Meclisi reisiniñ birinci muavini Nariman Celâl qıznıñ anasınen laf etken soñ bildirdi.
«Bu tutuv bile degil – hırsızlav ola. Altısında aqşam anası qızınen laf etti. Yedisinde saba erte cep telefonı endi cevap bermey edi, ve acayip bir şekilde onı tutqanları belli oldı, FSB hadimleridir, çünki başqa kimse Qırımda bunı yapmay», – dep tarif etti Celâl.
Onıñ aytqanına köre, Haticeniñ qorantası bulunğan yerini ve uquqiy yardım alıp alamağanını bilmey.
«Belli olğan tek şey bar – anasına FSB vekilleri ayttı: «Baqıñız, ses çıqarmañız, bir şey aytmañız – daa beter olacaq». FSBniñ ananeviy tevsiyeleri bu», – dep qayd etti o.
Celâl qayd etkenine köre, böyle adiselerde haber ve diqqat insannı daa beter aqibetlerden qorumağa yardım ete.
Qırımtatar resurs merkezi bildirgenine köre, mayısnıñ 6-nda saba Hatice Eski Qırımdan Aqmescitke ketmek içün avtobusqa mindi, soñra ise ğayıp oldı. Cep telefonı qapalı edi, tuvğanları bulunğan yerini bilmey edi.
Mayısnıñ 7-nde belli olğanına köre, genç qız Rusiye uquq qoruyıcıları tarafından tutuldı. Al-azırda tutuv sebepleri belli degil. Bulunğan yeri aqqında resmiy tafsilâtlar yoq.
Qırımtatar resurs merkezi qayd etkenine köre, bu Qırım yaşlarını qorquzmaq içün yapılğan daa bir qanunsız tutuv örnegi ola.
Mayısnıñ 6-nda Qırım aq qorçalayıcı gruppasınıñ (QAQG) idare reisi Olga Skripnik «Vatandaş cemiyeti Rusiye esirliginde» adlı tedbirde çıkışta bulunıp, Qırımda soñki yıl devamında Rusiye uquq qoruyıcıları yarımadanıñ Rusiye işğaline qarşı aktsiyalarda iştirak etken qadınlarnıñ taqip etilüvini quvetleştirdi.
«KrımSOS» aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etildi. Cinaiy davalarnıñ sebebi Rusiyede yasaqlanğan teşkilâtlarnen bağlar, devlet hainligi, casuslıq, açıq fikir bildirüvleri, diversiyalar ya da zorbalıq çağıruvlarında qabaatlavlar olğan.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
